‘హలో వరల్డ్‌’ అంటూ వచ్చిన సదా..!

చాలా కాలం తర్వాత ఆమె ఓ వెబ్‌సిరీస్‌తో తెలుగు ప్రేక్షకుల ముందుకు వస్తోంది. ఆమె నటించిన ‘హలో వరల్డ్‌’ సిరీస్‌ ఆగస్టు 12న జీ5 వేదికగా విడుదల కానుంది.

సదా పూర్తి పేరు సదా మహమ్మద్‌ సయ్యద్‌. మహారాష్ట్రలోని రత్నగిరిలో 1984 ఫిబ్రవరి 17న జన్మించింది.

సదాకు చిన్నతనం నుంచే నటన, డ్యాన్స్‌పై ఆసక్తి ఉండేది. పదో తరగతిలోనే సినిమా అవకాశం వస్తే తల్లిదండ్రులు ఒప్పుకోలేదట.

ముంబయిలో ఇంజినీరింగ్‌ చదువుకుంటూనే యాక్టింగ్‌ స్కూల్‌లో చేరింది. అప్పుడే తేజ దర్శకత్వం వహించిన ‘జయం’లో సదాకు అవకాశం వచ్చింది.

తొలి చిత్రంతోనే సదాకు పాపులారిటీ పెరగడమే కాదు.. ఉత్తమ నటిగా ఫిల్మ్‌ఫేర్‌ అవార్డూ లభించింది.

ఆ తర్వాత ప్రాణం, నాగ, దొంగ-దొంగది, లీలా మహల్‌ సెంటర్‌, ఔనన్నా.. కాదన్నా, వీరభద్ర, క్లాస్‌మేట్‌ తదితర చిత్రాల్లో నటించింది.

తెలుగుతోపాటు తమిళ, మలయాళ, కన్నడ, హిందీ భాషల్లో 40కిపైగా చిత్రాల్లో సదా నటించింది.

2005లో శంకర్‌ తెరకెక్కించిన ‘అపరిచితుడు’ సదాకు మరింత క్రేజ్‌ తెచ్చిపెట్టింది. కానీ, ఆ తర్వాత నటించిన సినిమాలు ఆమెకు అనుకున్నంత సక్సెస్‌ ఇవ్వలేదు.

‘చంద్రముఖి’, ‘ఆనంద్‌’ సినిమాల్లో హీరోయిన్‌గా నటించే అవకాశం వచ్చినా.. వివిధ కారణాలతో సదా వాటిని మిస్‌ చేసుకుంది.

2015 వరకు వరసపెట్టి సినిమాలు చేసిన సదా.. ఆ తర్వాత వెండితెరపై కనిపించడం తగ్గించింది. 2018లో ‘టార్చ్‌లైట్‌’ చిత్రంతో ప్రేక్షకుల్ని పలకరించింది. 

ఈ టీవీలో ప్రసారమవుతోన్న డ్యాన్స్‌ షో ‘ఢీ’లో కొన్ని సీజన్లు, ‘జబర్దస్త్‌’ కామెడీ షోలో కొన్ని ఎపిసోడ్లలో జడ్జ్‌గా వ్యవహరించింది సదా.

సోషల్‌మీడియాలోనూ యాక్టివ్‌గా ఉండే ఈ భామ.. తన ఫొటోలను ఎప్పటికప్పుడు పోస్టు చేస్తుంటుంది. ఆమె అందానికి నెటిజన్లు ఫిదా అవుతున్నారు.

ప్రస్తుతం ఓ కన్నడ చిత్రంతోపాటు తెలుగులో ఇటీవల హిట్‌ కొట్టిన ‘డీజే టిల్లు’ సీక్వెల్‌లో సదా నటిస్తున్నట్లు సమాచారం.

ఈ అమ్మడు వీగన్‌.. జంతుహక్కుల పోరాటాలకు మద్దతిస్తుంటుంది. తను తోలు ఉత్పత్తులను అస్సలు వినియోగించదు.

ముంబయిలో ‘ఎర్త్‌లింగ్స్‌ కేఫ్‌’ పేరుతో శాకాహార రెస్టారెంట్‌ను,‘సదాస్‌ గ్రీన్‌ లైఫ్’ పేరుతో యూట్యూబ్‌ ఛానల్‌ను నిర్వహిస్తోంది సదా.