జాబ్‌లు కోల్పోయి.. రూ.25 వేల పెట్టుబడితో రెండేళ్లలో రూ.10 కోట్లు సంపాదించిన ఇద్దరు మిత్రులు!

Appetitee: వారిద్దరూ బాల్యమిత్రులు.. ఇంజినీరింగ్ చదువుకొని ఉద్యోగాలు సాధించారు. కరోనా కారణంగా దేశవ్యాప్తంగా లాక్‌డౌన్ విధించడంతో.. మొదటి నెల రోజులపాటు ఇంట్లోనే కూర్చొని సినిమాలు చూస్తూ ఎంజాయ్ చేశారు. కానీ లాక్‌డౌన్ ఆంక్షలు కొనసాగడంతో.. కంపెనీ వారిని ఉద్యోగాల నుంచి తొలగించింది. మళ్లీ ఉద్యోగాల కోసం ప్రయత్నించకుండా.. ఈసారి వారిద్దరూ సొంతంగా ఏదైనా వ్యాపారం చేయాలని భావించారు. కానీ ఏ వ్యాపారం చేస్తే బాగుంటుందనే విషయంలో వారు ఓ అంచనాకు రాలేకపోయారు.

ఆ క్షణంలో వారికి మాంసం, పౌల్ట్రీ ప్రాసెసింగ్ మీద స్థానిక యూనివర్సిటీ నిర్వహించిన ట్రైనింగ్ కోర్సు గుర్తుకొచ్చింది. అవ్యవస్థీకృతంగా ఉన్న మాంసం విక్రయ మార్కెట్లోకి అడుగుపెట్టాలని మిత్రులిద్దరూ నిర్ణయించుకున్నారు. ఈ వ్యాపారం ప్రారంభించిన తొలినాళ్లలో కుటుంబ సభ్యుల నుంచి వారికి సహకారం లభించలేదు. చదువుకొని ఉద్యోగాలు చేసుకోకుండా.. మాంసం వ్యాపారం ఏంటని అనుకున్నారు. ఇలాగైతే వీరికి పెళ్లి కావడం కష్టమని ఇంట్లో వాళ్లు భయపడ్డారు.

కానీ వారిద్దరూ వెనక్కి తగ్గలేదు. తమ దగ్గరున్న డబ్బులతోపాటు, ఫ్రెండ్స్ దగ్గర్నుంచి కొంత మొత్తం తీసుకొని.. రూ.25 వేలతో, ఇంటి పక్కనే ఉన్న వంద చదరపు అడుగుల విస్తీర్ణంలో ‘అపెటైటీ (ఆకలి)’ని ప్రారంభించారు. పరిశుభ్రమైన వాతావరణంలో.. నాణ్యమైన మాంసాన్ని విక్రయించడం మొదలుపెట్టారు. ఆన్‌లైన్ ద్వారానూ ఆర్డర్లు తీసుకొని వ్యాపారాన్ని పెంచారు. దీంతో రెండేళ్లలోపే దాని టర్నోవర్ నెలకు రూ.4 లక్షలు దాటింది. బిజినెస్ పెరగడంతో.. వారుండే ఔరంగాబాద్‌లోని ఫ్యాబీ కంపెనీ వీళ్లకు ఆఫర్ ఇచ్చింది. రూ.10 కోట్లతో ‘అపిటైటీ’లో మెజార్టీ వాటాను కొనుగోలు చేసింది.

ఇంతకూ ఆ ఇద్దరు బాల్య మిత్రులు ఎవరో చెప్పలేదు కదా.. వారే ఆకాశ్ మస్కే, ఆదిత్య కిర్తనే. నామమాత్ర పెట్టుబడితో ఈ మిత్రులిద్దరూ రెండేళ్లలో పది కోట్లు సంపాదించారు. ‘మాంసం వ్యాపారంలో వారికి ప్రాఫిట్ మార్జిన్ 40 శాతం ఉంటుంది. ఔరంగాబాద్‌లో మాంస విక్రయ వ్యాపారం పూర్తిగా అవ్యవస్థీకృతంగా ఉంద’ని ఫ్యాబీ డైరెక్టర్ ఫహద్ సయ్యద్ తెలిపారు.

అపెటైటీలో మెజార్టీ వాటాను ఫ్యాబీ దక్కించుకున్నప్పటికీ.. సంస్థ పేరును మార్చబోమని ఫహద్ చెప్పారు. సముద్ర ఉత్పత్తులను సైతం విక్రయించేలా ప్లాన్ చేస్తున్నామన్నారు. కస్టమర్లు ఆర్డర్ చేయడానికి వీలుగా ఓ యాప్ తయారు చేస్తామని.. రానున్న మూడేళ్లలో వంద షాపులను పునరుద్ధరిస్తామని చెప్పారు. ఇంటింటికి తిరిగి ఆర్డర్లను ఇవ్వడం కోసం ఎలక్ట్రిక్ వాహనాలను సమకూర్చుకుంటామన్నారు.

మహారాష్ట్రలోని ఇతర సిటీలకు విస్తరిస్తోన్న అపెటైటీ.. ఫ్రాంచైజీ మోడల్‌ను పరిచయం చేస్తోంది. మీట్ ఇండస్ట్రీలో తమకంటూ ఓ బ్రాండ్ ఏర్పర్చుకున్న ఈ సంస్థ.. ఇతర రాష్ట్రాల్లోనూ విస్తరించేందుకు ప్రణాళికలు రచిస్తోంది.