BMW కొత్త స్పోర్ట్స్ బైకు.. ధర తక్కువే, కేవలం రూ.3,999 ఈఎంఐకే కొనుగోలు చేసుకోవచ్చు!

BMW కొత్త బైకు త్వరలోనే మార్కెట్లోకి విడుదల కాబోతుంది. G 310 RR పేరుతో ఈ బైకును బీఎండబ్ల్యూ మార్కెట్లోకి తీసుకొస్తోంది. త్వరలోనే భారత మార్కెట్లోకి రాబోతున్న బీఎండబ్ల్యూ ఈ స్పోర్ట్స్ బైకు ప్రీబుకింగ్స్ ఇప్పటికే ప్రారంభమయ్యాయి. రీఫండబుల్ మొత్తంతో ఆన్‌లైన్ లేదా కంపెనీ అధికారిక అన్ని డీలర్‌షిప్‌ల వద్ద ఈ బైకును బుక్ చేసుకోవచ్చు. ఫస్ట్ కమ్ ఫస్ట్ సర్వ్ బేసిస్‌లో ఈ బైకు డెలివరీ ఉంటుంది. జూలై 15న ఈ కొత్త స్పోర్ట్స్ బైకు భారత మార్కెట్లోకి లాంచ్ అవుతోంది.

ఈ బైకును కొనుగోలు చేసే కస్టమర్లకు BMW ఇండియా ఫైనాన్సియల్ సర్వీసెస్‌తో కలిసి ఆర్థిక సాయాన్ని అందిస్తోంది. జీరో డౌన్ పేమెంట్‌తో కేవలం రూ.3,999 నెలవారీ ఈఎంఐకే ఈ బైకును కస్టమర్లు కొనుగోలు చేసుకోవచ్చు. ఈ ఆర్థిక సాయంలో భాగంగా ఇన్సూరెన్స్, యాక్ససరీలను కూడా కొనుగోలు చేసుకునేందుకు మీకు ఆప్షన్ లభిస్తుంది.

BMW G 310 RR టీజర్‌ను కంపెనీ పలుసార్లు విడుదల చేసింది. బీఎండబ్ల్యూ జీ 310 ట్విన్స్‌తో ఇది ప్లాట్‌ఫామ్‌ను షేరు చేసుకుంటుంది. ఈ బైకుకు 313 సీసీ సింగిల్ సిలిండర్, 4 స్ట్రోక్, డీఓహెచ్‌సీ ఇంజిన్‌ను అందిస్తుంది. 6 స్పీడ్ గేర్ బాక్స్‌తో ఈ ఇంజిన్ రూపొందించింది. ఈ స్పోర్ట్స్ బైకును కూడా BMW సరసమైన ధరలలో అందుబాటులోకి తెస్తోంది. ఈ బైకు ధర ఎక్స్‌షోరూంలో రూ.2.90 లక్షలుగా ఉంటుందని తెలుస్తోంది. ఈ లాంచ్‌తో బీఎండబ్ల్యూ మోటోరాడ్ ఇండియా మూడు ఎంట్రీ లెవల్ బైకులను దేశంలోకి తీసుకొచ్చినట్టవుతుంది. ఈ బైకు ద్వారా భారత్‌లో కంపెనీ మార్కెట్ షేరును మరింత పెంచుకోనుంది.

ఈ బైకు మార్కెట్లోకి లాంచ్ అయిన తర్వాత కేటీఎం ఆర్‌సీ 390, కవాసకి నింజా 300, టీవీఎస్ అపాచే ఆర్ఆర్310లకు గట్టి పోటీ ఇవ్వనుంది. ఈ మోటార్‌సైకిల్ ఎరుపు, నీలం, వంకాయ వంటి రంగులలో మార్కెట్లోకి వస్తుంది. ఇది అచ్చం టీవీఎస్ అపాచే ఆర్ఆర్ 310ను పోలి ఉంటుందని తెలుస్తోంది.

Also Read :

Also Read :