港隊門神范俊業19歲兒子進軍娛樂圈 韓星外型被封「隱藏小鮮肉」

年僅19歲、身高179cm的范麒智(Kenji)今年因客串ViuTV劇集《ISWIM》人氣急升被封作「隱藏小鮮肉」,亦隨之成為各大品牌寵兒。今日(9日)他盛裝出席《ELLE》慶典派對,笑言自己雖然熱愛運動,兼且是前香港足球代表隊守門員及隊長范俊業的兒子,但相比起陽光大男孩打扮,自己更加鍾情於高冷的風格,就如今日一身紫藍色穿搭一樣:「高冷形象不嬲喺我嘅骨子裏面!」

生於運動家庭的Kenji,不但遺傳到爸爸的身高和外形,亦擁超強優良基因運動神經非常發達,現時更是香港理工大學的水球代表隊成員,每年都會打大專盃。但不要以為運動員就一定打扮非常「求其」,Kenji亦是一個非常熱愛時尚的時尚達人,平時他出活動時所穿的服飾自己都有出不少意見,而且亦經常親自到小店搜羅最新時尚單品:「我覺得唔一定要係名牌嘅衫先可以着到自己好高貴、好靚,我個人好講求design,可能係本地或者一啲小眾品牌都已經好出色,我希望以後可以開拓到自己嘅時裝品牌!」Kenji比較喜歡時尚一面的自己還是運動裝扮的自己?他笑稱:「我而家可以全心全意投入幕前,所以可以好100%咁畀大家見到我係一個點樣嘅人,其實我係一個好多變化嘅人,我都會好想嘗試下啲陽光、charm啲嘅一面畀大家睇!」

Kenji坦言現時未有新的劇集或電影拍攝計劃,但原來他以前曾經與爸爸范俊業約定要一同父子檔合作:「算係我同我爸爸嘅一個約定?我哋兩個都好想可以一齊拍劇、拍廣告,都好想一齊試下!」今個月就是四年一度的世界盃,至少就受到爸爸薰陶的Kenji當然亦是一名足球擁躉,被問到兩父子有沒有試過看球賽時意見不合,他坦言從來未試過:「我爸爸好識點樣理性分析比賽,可能我都受到佢嘅影響,我都比較有sense,可以一齊討論溝通,兩隊都會一齊拎嚟比較,所以拗撬就比較少!」