歡樂滿東華 | 一文睇清表演尷尬位 港姐背心上陣淋冰水+郭柏妍唱到走音

《香港小姐再競選》三甲何沛珈、李芷晴及陳懿德背心上陣,大玩「淋冰水」籌款。TVB電視城出名大風,三位港姐都玩到騰騰震,不少網民都替三位港姐感到可憐!

至於江嘉敏就同羅浩銘一起表演飛車,江嘉敏事前曾經以為只需要好優雅咁坐喺飄逸車上,誰不知道要一齊揸車,羅浩銘仲要在車頂上做出高難度動作!江嘉敏笑言自己每次練習前都唔敢食飯:「頭幾次練真係有啲頭暈,成日「Fing」到阿Sir都有啲頭暈,所以專登唔食飯過嚟,驚我會嘔啊!」

藝人何泳芍、郭柏妍、邵珮詩和王子涵等人在《歡樂滿東華2022》表演花式滑板,雖然其中幾位女藝人都對滑板略知一二,但大部分都要從頭學起,今次表演仲要大玩花式滑板,令一班女藝人都話驚到想喊!

到正式表演的時候,一班女藝人比想象中錫身,只是在斜台和兩三級樓級慢慢滑下來,睇到一班網民非常無語,紛紛留言表示:「我到底睇左啲咩」、「仲衰過公園板仔」、「咁樣叫跳咩」、「咁簡單要練啲咩」等。

林敏驄率領《下流上車族》一班演員在《歡樂滿東華2022》獻唱《下流上車族》的主題曲籌款。林敏驄與郭柏妍在彩排時一同接受訪問,郭柏妍就話自己是浴室高手,搞到林敏驄都搞笑回覆道:「咁一定失禮啦,到時應該失敗告終喇!結果郭柏妍就真係唱到走曬音,仲要唱得最大聲!

何廣沛、何慈茵、李君妍、林子超、譚坤倫等人亦會為《打沙煲 爆善款》環節大打出手。何廣沛要與眾男對打,李君妍同何慈茵就要凌空打沙煲,在彩排的時候兩人已經達到雙手通紅!到正式表演時,一班藝人除了打砂煲之外,仲要叠塔羅漢、蒙眼打砂煲,非常危險!