Loan: కొత్తగా బిజినెస్ స్టార్ట్ చేయాలనుకునే వారికి ఎస్‌బీఐ గుడ్ న్యూస్.. రూ.10 లక్షల నుంచి రూ.కోటి వరకు రుణం!

Business Loan: మీరు కొత్తగా వ్యాపారం ప్రారంభించాలని చూస్తున్నారా? అయితే చేతిలో డబ్బులు లేవా? ఏం చేయాలో తెలియడం లేదా? అయితే మీరు బ్యాంక్‌కు వెళ్లి బిజినెస్ లోన్ కోసం అప్లై చేసుకోవచ్చ. చాలా బ్యాంకులు కస్టమర్లకు ఈ తరహా సదుపాయం కల్పిస్తున్నాయి. ఇందుకు దేశీ అతిపెద్ద బ్యాంక్ స్టేట్ బ్యాంక్ ఆఫ్ ఇండియా (ఎస్‌బీఐ) కూడా మినహాయింపేమీ కాదు. ఎస్‌బీఐ అర్హత కలిగిన వారికి పలు రకాల బిజినెస్ లోన్స్ అందిస్తోంది. వీటిల్లో స్టాండప్ ఇండియా లోన్ కూడా ఒకటి.

ఎస్‌బీఐ స్టాండప్ ఇండియా లోన్ కింద అర్హత కలిగిన వారు రూ.కోటి వరకు రుణం పొందొచ్చు. అలాగే కనీసం రూ. 10 లక్షల రుణం తీసుకోవచ్చు. వర్కింగ్ క్యాపిటల్ ఫెసిలిటీస్ కోసం ఈ లోన్ పొందొచ్చు. ఎస్‌సీ, ఎస్‌టీ, మహిళలు లక్ష్యాంగా బ్యాంక్ ఈ రుణాలు అందిస్తోంది. మ్యానుఫ్యాక్చరింగ్, సర్వీసెస్ లేదంటే ట్రేడింగ్ సెక్టార్ కింద గ్రీన్‌ఫీల్డ్ ప్రాజెక్టుల ఏర్పాటుకు ఈ లోన్ పొందొచ్చు. వడ్డీ రేటు ఆకర్షణీయంగా ఉంటుందని బ్యాంక్ పేర్కొంటోంది. రుణ రేటు ఎంసీఎల్ఆర్‌తో లింక అయ్యి ఉంటుంది.

Also Read:

ఎలాంటి తనఖా లేకుండానే ఈ తరహా రుణాలు పొందొచ్చు. క్రెడిట్ గ్యారంటీ స్కీమ్ ఫర్ స్టాండప్ ఇండియా స్కీమ్ కింద ఈ రుణాలు కవర్ అవుతాయి. తీసుకున్న రుణాన్ని 7 ఏళ్లలోపుగా తిరిగి చెల్లించాల్సి ఉంటుంది. మారటోరియం పీరియడ్ 18 నెలలు పొందొచ్చు. ప్రాసెసింగ్ ఫీజు రుణ మొత్తంలో 0.2 శాతంగా ఉంటుంది. జీఎస్‌టీ పడుతుంది. లోన్ కోసం ఆన్‌లైన్‌లో కూడా అప్లై చేసుకోవచ్చు. స్టాండప్ ఇండియా లోన్‌పై క్లిక్ చేసి దరఖాస్తు చేయొచ్చు.

కాగా మరోవైపు దేశీ కేంద్ర బ్యాంక్ రిజర్వు బ్యాంక్ ఆఫ్ ఇండియా (ఆర్‌బీఐ) కీలక పాలసీ రేట్లను పెంచుకుంటూ వెళ్తోంది. ఈ క్రమంలోనే బ్యాంకులు కూడా రుణ రేట్లను పెంచేస్తున్నాయి. ఇప్పటికే ఎస్‌బీఐ సహా పలు బ్యాంకులు రుణ రేట్లు పెంచాయి. ఇప్పుడు మరోసారి రుణాలపై వడ్డీ రేట్లు పెరగొచ్చనే అంచనాలు ఉన్నాయి. ఇందుకు ప్రధాన కారణం ఆర్‌బీఐ మరోసారి రెపో రేటును పెంచే ఛాన్స్ ఉందని నిపుణులు పేర్కొంటున్నారు.

Also Read: